Anupambharat News Bureau
ନୟାଗଡ, ୨୪ା୧୨(ଅନୁପମ ମିଡ଼ିଆ): ନୟାଗଡ଼ ଯଦୁପୁର ପରୀ ହତ୍ୟା ମାମଲାରେ ଗିରଫ ମୁଖ୍ୟ ଅଭିଯୁକ୍ତ ସରୋଜ ସେଠୀକୁ ଯଦୁପୁର ଆଣି ସିନ୍ ରିକ୍ରିଏସନ୍୍ କରିଛି ଏସଆଇଟି । ଘଟଣାସ୍ଥଳକୁ ଆଣି ସରୋଜ ସେଠୀକୁ ଡେମୋ କରାଇଛି ଏସଆଇଟି । ପୋଖରୀ କୂଳରେ ଘଟଣା ଦିନ କ’ଣ କରିଥିଲା ତାହାର ଡେମୋ କରି ଦେଖାଇଛି ସରୋଜ । ଏଥିସହ ସରୋଜକୁ ଘଟଣାସ୍ଥଳରେ ଟିକିନିଖି ପଚାରିବା ସହ ତଥ୍ୟ ସଂଗ୍ରହ କରିଛନ୍ତି ଏସଆଇଟି ମୁଖ୍ୟ ଅରୁଣ ବୋଥ୍ରା । ସେହିପରି ସରୋଜ ଘରୁ ମିଳିଥିବା ଗାମୁଛା ବଡ ପ୍ରମାଣ ଦେବ ବୋଲି କହିଛନ୍ତି ବୋଥ୍ରା । ଏନେଇ ଅଧିକ ସୂଚନା ଦେଇ ସେ କହିଛନ୍ତି ଯେ, ପରୀର ହତ୍ୟା ପରେ ବୋହିଥିବା ରକ୍ତକୁ ସରୋଜ ଏହି ଗାମୁଛାରେ ପୋଛିଥିଲା । ଏହି ଗାମୁଛାକୁ ସରୋଜର ଘରୁ ଜବତ କରାଯାଇଛି । ପରୀ ଶରୀରର ବାକି ହାଡ଼ କେଉଁଆଡେ ଗଲା ସେ ସମ୍ପର୍କିତ ଗଣମାଧ୍ୟମର ପ୍ରଶ୍ନର ଉତ୍ତରରେ ଏସଆଇଟି ମୁଖ୍ୟ ଅରୁଣ ବୋଥ୍ରା ସୂଚନା ଦେଇ କହିଛନ୍ତି ଯେ, ପରୀ ଶରୀରର କୌଣସି ହାଡ଼ ଗାଏବ୍ ହୋଇନାହିଁ । ଶବ ବ୍ୟବଚ୍ଛେଦ ରିପୋର୍ଟରେ କୌଣସି ହାଡ଼ ମିଳିନଥିବା କୁହାଯାଇଛି । ବିଶେଷଜ୍ଞ ଡ଼ାକ୍ତର ମାନେ ହାଡ଼ ମିଳିନଥିବା ନେଇ କିଛି କହିନାହାଁନ୍ତି । ଦେହାବଶେଷ ମିଳିବା ପରେ ଶବ ଚିହ୍ନଟ ପାଇଁ ଡିଏନଏ ଟେଷ୍ଟ କରାଯାଇଥିଲା । ଡ଼ିଏନଏ ଟେଷ୍ଟ କରିବା ପାଇଁ ଡ଼ାକ୍ତର ମାନେ କିଛି ହାଡ଼ ପଠାଇଥିଲେ । ସେହିପରି ଡ଼ଗ୍ ସ୍କ୍ୱାଡ୍ କାହିଁକି ଗନ୍ଧ ବାରିପାରିଲା ନାହିଁ ପ୍ରଶ୍ନର ଉତ୍ତରରେ ବୋଥ୍ରା କହିଛନ୍ତି ଯେ, ମାମଲାରେ ଏସଆଇଟି ଡ଼ଗ୍ ସ୍କ୍ୱାଡ୍ ବ୍ୟବହାର କରିନାହିଁ । ଅନ୍ୟପକ୍ଷେ ଆଜି ଅଭିଯୁକ୍ତ ସରୋଜର ରିମାଣ୍ଡ ଅବଧି ସରିଥିବାରୁ ପୋକସୋ କୋର୍ଟ ଅଭିଯୁକ୍ତକୁ ବିଚାର ବିଭାଗୀୟ ହାଜତକୁ ପଠାଇଛନ୍ତି । ଏଠାରେ ଉଲ୍ଲେଖଯୋଗ୍ୟ, ଏସଆଇଟି ପୂର୍ବରୁ ଅଭିଯୁକ୍ତକୁ ତିନି ଦିନିଆ ରିମାଣ୍ଡରେ
ନେଇଥିଲା । ଏସଆଇଟି ପକ୍ଷରୁ ଆଜି ଅଭିଯୁକ୍ତ ସରୋଜକୁ କୋର୍ଟରେ ହାଜର କରାଯାଇଥିଲା । କୋର୍ଟ ଅଭିଯୁକ୍ତକୁ ବିଚାର ବିଭାଗୀୟ ହାଜତକୁ ପଠାଇଛନ୍ତି ।
