Anupambharat News Bureau
ନୂଆଦିଲ୍ଲୀ: ପଡ଼ୋଶୀ ରାଷ୍ଟ୍ର ପାକିସ୍ତାନକୁ ଭାରତର ଗୋପନୀୟ ତଥ୍ୟ ପ୍ରଘଟ କରିବା ଘଟଣା କେନ୍ଦ୍ର ସରକାରଙ୍କ ଏକ ଡ୍ରାଇଭର ପାଇଁ ମହଙ୍ଗା ପଡିଛି । ଏପରି ଜଣେ ବ୍ୟକ୍ତିଙ୍କୁ ଆଜି ଦିଲ୍ଲୀ ପୋଲିସର ଗୋଇନ୍ଦା ସଂସ୍ଥା ସହଯୋଗରେ ଗିରଫ କରାଯାଇଥିବା ଘଟଣା ଚର୍ଚ୍ଚାକୁ ଆସିଛି । ଏହା ମଧ୍ୟ ସବୁଠାରୁ ଆଲୋଚନାର କେନ୍ଦ୍ରକୁ ଆସିଛି ଯେ, ଗିରଫ ବ୍ୟକ୍ତି ଜଣକ କେନ୍ଦ୍ର ବୈଦେଶିକ ମନ୍ତ୍ରଣାଳୟରେ ଡ୍ରାଇଭର ଭାବେ କାର୍ଯ୍ୟ କରୁଥିଲା । ସେ ପଡ଼ୋଶୀ ପାକିସ୍ତାନକୁ କିଛି ଗୁପ୍ତ ତଥ୍ୟ ଯୋଗାଇ ଦେଇଥିବାରୁ ତାକୁ ଗିରଫ କରାଯାଇଛି । ପାକିସ୍ତାନ ଗୁଇନ୍ଦା ସଂସ୍ଥା ଆଇଏସଆଇ ଦ୍ୱାରା ବିଛା ଯାଇଥିବା ହନି ଟ୍ରାପରେ ଫସି ବ୍ୟକ୍ତି ଜଣକ ଦେଶ ସହିତ ବିଶ୍ୱାସଘାତକତା କରିଥିବା ଜଣାପଡିଛି ।
ବୈଦେଶିକ ମନ୍ତ୍ରଣାଳୟର ଡ୍ରାଇଭର ଗିରଫ ହେବା ପରେ ହଇଚଇ ସୃଷ୍ଟି ହୋଇଛି । ଏବେ ମନ୍ତ୍ରଣାଳୟର ଆଉ କୌଣସି କର୍ମଚାରୀ କିମ୍ବା ଅଧିକାରୀ ଏହି ମାମଲାରେ ଜଡ଼ିତ ଅଛନ୍ତି କି ନାହିଁ, ତା’ର ତଦନ୍ତ ପୋଲିସ୍ ଓ ଗୁଇନ୍ଦା ବିଭାଗ ଆରମ୍ଭ କରିଛି । ଏତେ ଘଟଣା ଘଟିବା ପରେ ମଧ୍ୟ ବୈଦେଶିକ ମନ୍ତ୍ରଣାଳୟ ଏଯାଏ ମୁହଁ ଖୋଲିନାହିଁ । ସୂଚନା ଅନୁଯାୟୀ, ଆଜି ମନ୍ତ୍ରଣାଳୟରେ ଡ୍ରାଇଭର ଭାବେ କାମ କରୁଥିବା ଜଣେ ବ୍ୟକ୍ତିକୁ ଜବାହରଲାଲ ନେହରୁ ଭବନରୁ ଗିରଫ କରାଯାଇଛି । ଏହି ବ୍ୟକ୍ତି ଜଣକ ପାକିସ୍ତାନର ଗୁପ୍ତଚରଙ୍କ ଦ୍ୱାରା ବିଛା ଯାଇଥିବା ଜାଲରେ ଫସି ଯାଇଥିଲେ । ପୂନମ ଶର୍ମା ଓରଫ ପୂଜା ନାମରେ ଜଣେ ପାକିସ୍ତାନ ଗୁପ୍ତଚର ଡ୍ରାଇଭର ଜଣକୁ ନିଜ ମିଠାମିଠା କଥା କହି ନିଜ ପ୍ରେମରେ ଫସାଇଥିଲା । ଏହାପରେ ଟଙ୍କା ଓ ପ୍ରେମ ଲୋଭରେ ସେ ଗୁପ୍ତଚର ପୂଜାକୁ କିଛି ସମ୍ବେଦନଶୀଳ ଦସ୍ତାବିଜ ପଠାଇଥିଲା । ତେବେ କେଉଁ ସବୁ ଦସ୍ତାବିଜ ପଠାଇଥିଲା ଓ ତା’ ପରିଚୟ ପୋଲିସ୍ ଏଯାଏ ସାର୍ବଜନୀନ କରିନାହିଁ । ଏହାପୂର୍ବରୁ ଚଳିତ ବର୍ଷ ଅଗଷ୍ଟ ମାସରେ ରାଜସ୍ଥାନ ପୋଲିସ୍ ଦିଲ୍ଲୀରୁ ଜଣେ ୪୬ ବର୍ଷୀୟ ବ୍ୟକ୍ତିକୁ ଗୁଇନ୍ଦାଗିରି ଅଭିଯୋଗରେ ଗିରଫ କରିଥିଲା । ସେ ଭାରତରେ ରହି ପାକିସ୍ତାନ ପାଇଁ କାମ କରୁଥିବା ଜଣାପଡିଥିଲା ।
