Anupambharat News Bureau
ଭୁବନେଶ୍ୱର,୫ ।୧୧(ଅନୁପମ ମିଡିଆ): ଡୋପ୍ ଟେଷ୍ଟରେ ଧରାପଡ଼ି ଚାରି ବର୍ଷ ପାଇଁ ବାସନ୍ଦ ହୋଇଛନ୍ତି ଓଡ଼ିଆ ଭାରୋତ୍ତୋଳକ ରବି କୁମାର । ନ୍ୟାସନାଲ୍ ଆଣ୍ଟି ଡୋପିଂ ଏଜେନ୍ସି ବା ନାଡା ପକ୍ଷରୁ ଏନେଇ ମଙ୍ଗଳବାର ସୂଚନା ଦିଆଯାଇଛି । ଆଗକୁ ଟୋକିଓ ଅଲମ୍ପିକ୍ସ ଥିବା ବେଳେ ରବି କୁମାର ଡୋପିଂ ଟେଷ୍ଟରେ ଫେଲ୍ ହେବା ଭାରତକୁ ବଡ଼ ଝଟକା ଦେଇଛି । ରବି କୁମାର କହିଛନ୍ତି, ନାଡାରେ ଶୁଣାଣି ଶେଷ ହୋଇନି । ମୁଁ ମୋର ପକ୍ଷ ରଖୁଛି । ଗତ ଶୁଣାଣିରେ ନାଡା ମୋ ପକ୍ଷ ଗ୍ରହଣ କରିଛନ୍ତି । ମୁଁ ମୋର ଖେଳକୁ ବରବାଦ ହେବାକୁ ଦେବିନି । ରବି କୁମାରଙ୍କ ସହ ଅନ୍ୟ ୪ ଖେଳାଳିଙ୍କୁ ମଧ୍ୟ ନାଡା ପକ୍ଷରୁ ୪ ବର୍ଷ ପାଇଁ ବାସନ୍ଦ କରାଯାଇଛି । ସେମାନେ ହେଲେ ପୂର୍ଣ୍ଣିମା ପାଣ୍ଡେ, ଡିସ୍କସ୍ ଥ୍ରୋର ଧରମରାଜ ଯାଦବ, ସ୍ପ୍ରିଂଟର ସିତ ଏବଂ ଭାରୋତ୍ତୋଳକ ଗୁରୁମିଲ୍ ସିଂହ । ସୂଚନାଯୋଗ୍ୟ ଯେ ୨୦୧୦ ରାଜ୍ୟଗୋଷ୍ଠୀ କ୍ରୀଡ଼ାର ୬୯ କିଲୋଗ୍ରାମ ବର୍ଗରେ ରବି କୁମାର ସ୍ୱର୍ଣ୍ଣ ପଦକ ପାଇଥିଲେ । ସେହିପରି ୨୦୧୪ରେ ୭୭ କେଜି ବର୍ଗରେ ସେ ରୌପ୍ୟ ପଦକ ହାସଲ କରିଥିଲେ ।
