Anupambharat News Bureau
ମାଲକାନଗିରି/ବାଲିମେଳା,୨୫ା୫(ଅନୁପମ ମିଡ଼ିଆ):ଗତକାଲି ରାତ୍ରୀରେ କରୋନା କଟକଣାକୁ ଡରି ତେଲେଙ୍ଗାନା ରାଜ୍ୟକୁ ଦାଦନ ଖଟିବାକୁ ଯାଇଥିବା ଚିତ୍ରକୋଣ୍ଡା ବ୍ଲକ କନ୍ଧଗୁଡା ଓ ଗୁଣ୍ଠାବାଡା ଗ୍ରାମର ୧୧ ଜଣ ଦୁଇଟି ଦେଶୀ ଡ଼ଙ୍ଗାରେ ଲୁଚି ଛପି ସିଲେରୁ ନଦୀରେ ନିଜ ଘରକୁ ଫେରୁଥିବା ବେଳେ ମଝି ନଈରେ ଗୋଟିଏ ଡ଼ଙ୍ଗା ବୁଡି ଯାଇଥିଲା । ଏହା ଦେଖି ନିକଟରେ ଥିବା ଅନ୍ୟ ଏକ ଦେଶୀ ଡଙ୍ଗାକୁ ଯିବା ପାଇଁ କିଛି ବ୍ୟକ୍ତି ଡେଇଁ ପଡ଼ିଥିଲେ । ସେହି ସମୟରେ ହିଁ ଡଙ୍ଗାରେ ଥିବା ୩ଟି ପରିବାରର ୧୧ ଜଣ ସଦସ୍ୟ ପାଣି ମଧ୍ୟରେ ବୁଡି ଯାଇଥିଲେ । ଗୋଟିଏ ପରିବାର ଜଣେ ବାପା ତାର ୨ ପୁଅକୁ ପାଣି ମଧ୍ୟରୁ ଉଦ୍ଧାର କରି କଷ୍ଟେ ମଷ୍ଟେ କୂଳରେ ପହଞ୍ଚିଥିଲେ । ତେବେ ଏହି ଡଙ୍ଗାବୁଡ଼ି ଘଟଣାରେ ଏପର୍ଯ୍ୟନ୍ତ ୬ ଜଣଙ୍କ ମୃତ ଦେହ ଉଦ୍ଧାର ହୋଇଥିବା ବେଳେ ୨ ଜଣ ନିଖୋଜ ଅଛନ୍ତି । ଖବରପାଇ ରାତି ୧୦ଟା ସମୟରେ ଚିତ୍ରକୋଣ୍ଡା ଏସଡ଼ିପିଓ ସୁନାରାମ ହେମ୍ବ୍ରମ,ଚିତ୍ରକୋଣ୍ଡା ତହସିଲଦାରଟି, ପଦ୍ମନାଭ ଦୋରା ଏବଂ କୋରୁକୋଣ୍ଡା ଅଗ୍ନିଶମ ବାହିନୀ ରାତିତମାମ ଜଳ ରାଶି ମଧ୍ୟରେ ଖୋଜାଖୋଜି ଆରମ୍ଭ କରିଥିଲେ । ଘନ ଅନ୍ଧକାରରେ ଉଦ୍ଧାର କରିବା କଷ୍ଟକର ହୋଇପଡିଥିଲା । ତଥାପି ୧୦ ମାସର ଶିଶୁର ମୃତ ଦେହ ଉଦ୍ଧାର କରାଯାଇଥିଲା । ସକାଳୁ ଆଉ ୨ ଜଣଙ୍କ ମୃତ ଦେହ ଓ ମଧ୍ୟାହ୍ନରେ ଆଉ ୩ ଜଣଙ୍କ ମୃତ ଦେହ ଉଦ୍ଧାର ହୋଇଛି । ଏଥିସହ ଅଗ୍ନିଶମ ବାହିନୀ ଏବଂ ସ୍ଥାନୀୟ ଲୋକଙ୍କ ସହାୟତାରେ ଜଳରାଶି ମଧ୍ୟରେ ଉଦ୍ଧାର କାର୍ଯ୍ୟ ଜାରି ରହିଥିବା ଦେଖିବାକୁ ମିଳିଛି । ନିଜେ ମାଲକାନଗିରି ଜିଲ୍ଲାପାଳ ଡା, ୟେଦୁଲା ବିଜୟ ଘଟଣାସ୍ଥଳରେ ପହଞ୍ଚି ମୃତକଙ୍କ ପରିବାରକୁ ଭେଟିଛନ୍ତି । ଖୁବ ଶିଘ୍ର ମୃତକଙ୍କ ପରିବାର ବର୍ଗଙ୍କୁ ସମସ୍ତ ପ୍ରକାର ଆର୍ଥିକ ସହାୟତା ଦିଆଯିବ ବୋଲି ଜିଲ୍ଲାପାଳ ସୂଚନା ଦେଇଛନ୍ତି । ଏବେ ବି ନିଖୋଜଙ୍କ ଉଦ୍ଧାର କାର୍ଯ୍ୟ ଜାରି ରହିଛି ।
