Anupambharat News Bureau
ବ୍ରହ୍ମପୁର,୧୧ା୨(ଅନୁପମ ମିଡ଼ିଆ): ଟାଟା ମୋଟର୍ସରେ ଚାକିରୀ ଦେବା ନାମରେ ଠକେଇ ମାମଲାରେ ଆଜି ଅନ୍ୟତମ ଅଭିଯୁକ୍ତ ଦ୍ୱୟ ତଥା ପାଠକ ବାପା ଓ ପୁଅଙ୍କୁ ବ୍ରହ୍ମପୁର କୋର୍ଟରେ ହାଜର କରାଯାଇଥିବା ବେଳେ ଆସନ୍ତାକାଲି ତାଙ୍କୁ ଦିନିକିଆ ପୋଲିସ୍ ରିମାଣ୍ଡରେ ନେବାପାଇଁ କୋର୍ଟ ପକ୍ଷରୁ ନିର୍ଦ୍ଦେଶ ଦିଆଯାଇଥିବା ଜଣାପଡ଼ିଛି । ଗତ କିଛିଦିନ ତଳେ ଗୋଳନ୍ଥରା ଥାନାରେ ଟାଟା କମ୍ପାନୀରେ ଚାକିରୀ କରାଇବା ନାମରେ କେତେକ ବ୍ୟକ୍ତିଙ୍କ ଠାରୁ ଅର୍ଥ ଠକି ନେଇଥିବା ଅଭିଯୋଗରେ ୩ ଟି ଠକେଇ ମାମଲା ରୁଜୁ କରାଯାଇଥିବା ଏବଂ ଉକ୍ତ ମାମଲାରେ ଭିତ୍ତିରେ ବ୍ରହ୍ମପୁର ଏସ୍ଡ଼ିଜେଏମ୍ କୋର୍ଟ ପକ୍ଷରୁ ଜାରି ପ୍ରଡ଼କ୍ସନ୍ ୱାରେଣ୍ଟ ବଳରେ ଗୋପାଳପୁର ବିଧାୟକ ଡ଼.ପ୍ରଦୀପ କୁମାର ପାଣିଗ୍ରାହୀଙ୍କୁ ବ୍ରହ୍ମପୁର ଏସ୍ଡ଼ିଜେଏମ୍ କୋର୍ଟରେ ହାଜାର କରାଯାଇଥିଲା । ପରେ ତାଙ୍କୁ ୩ ଦିନ ବ୍ରହ୍ମପୁରରେ ଜେଲ୍ ହାଜତରେ ଅଟକ ରଖାଯିବା ପରେ ୭ ତାରିଖ ଦିନ ତାଙ୍କୁ ଝାରପଡ଼ା ଜେଲ୍କୁ ପଠାଇ ଦିଆଯାଇଛି । ଉକ୍ତ ମାମଲାରେ ଅନ୍ୟତମ ଅଭିଯୁକ୍ତ ଭାବେ ବିଧାୟକଙ୍କ ଭାବି ସମୁଦି ଅଭୟ ପାଠକ ଓ ଭାବି ଜ୍ୱାଇଁ ଆକାଶ ପାଠକଙ୍କୁ ଆଜି ଝାରପଡ଼ା ଜେଲ୍ରୁ କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ଆଣି ବ୍ରହ୍ମପୁର ଏସ୍ଡ଼ିଜେଏମ୍ କୋର୍ଟରେ ହାଜର କରାଯାଇଛି । ତାଙ୍କ ବିରୁଦ୍ଧରେ ଗୋଳନ୍ଥରା ଥାନାରେ ରୁଜୁ ମାମଲାରେ ଜଡ଼ିତ କରାଯିବା ପରେ ଆଜି ବ୍ରହ୍ମପୁର ଜେଲ୍ ହାଜତକୁ ପଠାଯାଇଥିବା ଏବଂ ଆସନ୍ତାକାଲି ଉଭୟ ବାପା ପୁଅଙ୍କୁ ଦିନିକିଆ ପୋଲିସ ରିମାଣ୍ଡରେ ଯିବା ପାଇଁ ଏସ୍ଡ଼ିଜେଏମ୍ ନିର୍ଦ୍ଦେଶ ଦେଇଥିବା ଜଣାପଡ଼ିଛି । ଉଭୟ ବାପା ପୁଅଙ୍କୁ ବ୍ରହ୍ମପୁର
କୋର୍ଟରେ ହାଜର ପରେ ବରିଷ୍ଠ ଆଇନଜୀବୀ ଦୀପକ ପଟ୍ଟନାୟକ ଓ ବିଧାୟକଙ୍କ ଧର୍ମପତ୍ନୀ ତଥା ଆଇନଜିବୀ ସୁଜାତା ପାଣିଗ୍ରାହୀ କୋର୍ଟରେ ସେମାନଙ୍କ ସପକ୍ଷରେ ଯୁକ୍ତି ବାଡ଼ିଥିଲେ ।
