Anupambharat News Bureau
ବାତ୍ୟା ‘ବୁରେଭି’ ଦୁର୍ବଳ ହୋଇ ଲଘୁଚାପର ରୂପ ନେବାପରେ ତାମିଲନାଡ଼ୁରେ ପ୍ରବଳ ବର୍ଷା ହୋଇଛି । ବର୍ଷାଜନିତ ବିଭିନ୍ନ କାରଣ ପାଇଁ ତାମିଲନାଡ଼ୁରେ ୭ ଜଣଙ୍କ ମୃତୁ୍ୟ ଘଟିଛି । ପ୍ରତ୍ୟେକ ମୃତକଙ୍କ ପରିବାର ସଦସ୍ୟଙ୍କୁ ରାଜ୍ୟ ସରକାର ୧୦ ଲକ୍ଷ ଟଙ୍କାର କ୍ଷତିପୂରଣ ଘୋଷଣା କରିଥିବା ବେଳେ ବାତ୍ୟା ପ୍ରଭାବିତ ଅଞ୍ଚଳରେ ଉଦ୍ଧାର ଓ ରିଲିଫ୍ କାର୍ଯ୍ୟ ତଦାରଖ ପାଇଁ ୧୧ ବରିଷ୍ଠ ମନ୍ତ୍ରୀ ନିୟୋଜିତ ହୋଇଛନ୍ତି । ସରକାରୀ ତଥ୍ୟ ଅନୁଯାୟୀ ବୁରେଭି ଯୋଗୁଁ ପ୍ରାୟ ୨ ହଜାର ଘର ଆଂଶିକ ନଷ୍ଟ ହୋଇଯାଇଛି । ଗାଈ ହରାଇଥିବା ଚାଷୀଙ୍କୁ ମଧ୍ୟ ସରକାର କ୍ଷତିପୂରଣ ଦେବେ । ଗାଈ ରଖିଥିବା ବ୍ୟକ୍ତି ପ୍ରତି ଗାଈ ପିଛା ୩୦ ହଜାର ଟଙ୍କା କ୍ଷତିପୂରଣ ପାଇବେ ବୋଲି ରାଜ୍ୟ ସରକାର ଘୋଷଣା କରିଛନ୍ତି । ବାତ୍ୟା ଯୋଗୁଁ ତାମିଲନାଡ଼ୁର ଦକ୍ଷିଣ ଉପକୂଳ ସ୍ଥିତ ବିଭିନ୍ନ ଅଞ୍ଚଳ ଗୁଡ଼ିକ ଜଳମଗ୍ନ ହୋଇଯାଇଛି ।
