Anupambharat News Bureau
କୋରାପୁଟ,୧୧ା୫(ଅନୁପମ ମିଡିଆ): ପଟ୍ଟାଙ୍ଗି ଥାନା କରଞ୍ଜଗୁଡା ଗ୍ରାମରେ ଚୂନମାଟି ଖୋଲିବାକୁ ଯାଇଥିବାବେଳେ ମାଟି ଅତଡା ଖସି ଦୁଇ ମହିଳାଙ୍କ ସମେତ ତିନିଜଣ ପ୍ରାଣ ହରାଇଛନ୍ତି । ମୃତକମାନେ ହେଲେ ପଟ୍ଟାଙ୍ଗି ବ୍ଲକ ଚନ୍ଦକା ପଞ୍ଚାୟତ ଦଳପତିଗୁଡା ଗ୍ରାମର ଚମ୍ପା ପାଲେଶି (୧୯),ଜୟନ୍ତୀ ପେଦାକାପୁ (୨୬) ଓ ସନା ନାୟକ ବିଶୁ(୨୭) । ସୂଚନା ଅନୁଯାୟୀ, ଦଳପତିଗୁଡା ଗ୍ରାମର ଚମ୍ପା, ଜୟନ୍ତୀ, ପାଲେଶି ଏବଂ ଧାନମତି (୧୭) ମିଶି ସନା ନାୟକ ବିଶୁର ଅଟୋରିକ୍ସାରେ କରଞ୍ଜଗୁଡା ଗ୍ରାମ ନିକଟ ପାହାଡକୁ ଚୂନପଥର ଖୋଳିବାକୁ ଯାଇଥିଲେ । ପାହାଡ ତଳେ ସେମାନେ ମାଟି ଖୋଳୁଥିବା ସମୟରେ ଉପରୁ ମାଟି ଅତଡା ଖସି ଯିବାରୁ ଅଟୋ ଚାଳକ ସନା ନାୟକ ସହ ଚମ୍ପା ଓ ଜୟନ୍ତୀ ମାଟି ତଳେ ଚାପି ହୋଇ ଯାଇଥିଲେ । ତେବେ ଦାନାୟା ଓ ଧନମତି କିଛି ଦୂରରେ ଥିବାରୁ ସାମାନ୍ୟ ଆହତ ହୋଇଥିଲେ ମଧ୍ୟ ପଦାକୁ ବାହାରି ଆସିଥିଲେ । ଦାନାୟା ଓ ଧନମତି ଠାରୁ ଖବର ପାଇ ନିକଟସ୍ଥ ଗ୍ରାମବାସୀ ପଟ୍ଟାଙ୍ଗି ପୋଲିସକୁ ସୂଚନା ଦେଇଥିଲେ । ପୋଲିସ ଘଟଣା ସ୍ଥଳରେ ପହଞ୍ଚି ମାଟି ତଳେ ଚାପି ହୋଇଥିବା ତିନିଜଣକୁ ଉଦ୍ଧାର କରିଥିଲେ ମଧ୍ୟ ସେତେବେଳକୁ ସମସ୍ତଙ୍କର ମୃତୁ୍ୟ ହୋଇ ସାରିଥିଲା । ଆହତଙ୍କୁ ପଟ୍ଟାଙ୍ଗି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି । ପୋଲିସ୍ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଛି ।
