Anupambharat News Bureau
ନୂଆଦିଲ୍ଲୀ: ଦୁଇ ଦେଶ ମଧ୍ୟରେ ଥିବା ମତଭେଦକୁ ଆଗାମୀ ଦିନରେ ବିବାଦ ବୋଲି ବୁଝିବେ ନାହିଁ ଭାରତ ଏବଂ ଚାଇନାଛ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ଏହା କହିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଚାଇନା ରାଷ୍ଟ୍ରପତି ଜିନପିଙ୍ଗଙ୍କ ମଧ୍ୟରେ ମହାବଲୀପୁରମର କୋଭଲମରେ ଥିବା ତାଜ ଫିଶରମେନ କୋଭ ରିସୋର୍ଟ ଏବଂ ସ୍ପାରେ ବୈଠକ ହୋଇଥିଲା ।
ଏହା ପୂର୍ବରୁ ଦୁଇ ଦେଶର ନେତା ଏକାଠି ଅନୌପଚାରିକ ଭାବରେ ଏକାଠି ହୋଇଥିଲେ । ୫୦ ମିନିଟ ଧରି ଏହି ଆଲୋଚାନ ହୋଇଥିଲା । ଏହି ବୈଠକରେ ଉଭୟ ଦେଶର ଅନୁବାଦକମାନେ ଥିଲେ । ଯେଉଁଥିରେ ମୋଦି ଦୁଇ ଦେଶର ସମ୍ପର୍କକୁ ନେଇ ଏପରି କହିଛନ୍ତି ।
ଏହି ଅବସରରେ ପ୍ରଧାନମନ୍ତ୍ରୀ ମୋଦି କହିଛନ୍ତି ଆଜିର ଏହି ଚେନ୍ନାଇ କନେକଫ ମିଟିଂ ଦୁଇ ଦେଶର ସମ୍ପର୍କକୁ ଆଗକୁ ନେବ । ଉଭୟ ଦେଶ ପରସ୍ପରକୁ ଆଗାମୀ ଦିନରେ ସହଯୋଗ କରିବେ । ଦୀର୍ଘ ୨ ହଜାର ବର୍ଷ ହେବ ଭାରତ ଏବଂ ଚାଇନା ଦୁନିଆର ପ୍ରମୁଖ ଆର୍ଥିକ ଶକ୍ତିଶାଳୀ ଦେଶ ମଧ୍ୟରେ ଅନ୍ୟତମ । ଏବେ ପୁଣିଥରେ ଦୁଇ ଦେଶ ମଧ୍ୟରେ ଏହି ବ୍ୟବସାୟିକ ସମ୍ପର୍କ ଆହୁରି ମଜବୁତ ହେବାକୁ ଯାଉଛି । ଗତବର୍ଷ ଚାଇନାର ବୁହାନରେ ଦୁଇ ଦେଶ ମଧ୍ୟରେ ବୈଠକ ହୋଇଥିଲା । ଏହି ବୈଠକ ଭାରତ ପାଇଁ ଗେମ ଚେଞ୍ଜର୍ସ ସାବ୍ୟସ୍ତ ହୋଇଥିଲା । ଉଭୟ ଦେଶ ପରସ୍ପରର ମତକୁ ସମ୍ମାନ ଦେବେ । ଦୁଇ ଦେଶର ସମ୍ବେଦନଶୀଳ ମାମଲାରେ ପରସ୍ପର ଚିନ୍ତା କରିବେ ।
ଏମିତିକି ଏହି ସମ୍ପର୍କ ଆଗାମୀ ଦିନରେ ବିଶ୍ୱ ଶାନ୍ତି ଏବଂ ସ୍ଥିରତା ଉପରେ ବାର୍ତ୍ତା ଦେବ ବୋଲି ପ୍ରଧାନମନ୍ତ୍ରୀ କହିଛନ୍ତି । ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଚାଇନା ରାଷ୍ଟ୍ରପତି ଜିନପିଙ୍ଗଙ୍କ ମଧ୍ୟରେ କଶ୍ମୀର ପ୍ରସଙ୍ଗରେ ଆଲୋଚନା ହୋଇନାହିଁ । ବୈଦେଶିକ ମନ୍ତ୍ରଣାଳୟର ସଚିବ ବିଜୟ ଗୋଖଲେ ଏହି ସୂଚନା ଦେଇଛନ୍ତି ।
ଦୁଇ ନେତାଙ୍କ ମଧ୍ୟରେ କି;ୁ ଆତଙ୍କବାଦ ଏବଂ କଟ୍ଟରପନ୍ଥୀ ଚିନ୍ତାଧାରା ପ୍ରସଙ୍ଗରେ ଆଲୋଚନା ହୋଇଛି । ପୂର୍ବରୁ ଭାରତ ସ୍ପଷ୍ଟ କରିସାରିଛି ଯେ କଶ୍ମୀର ଭାରତର ଅନ୍ତରୀଣ ପ୍ରସଙ୍ଗ ଏଥିରେ କୌଣସି ଦେଶ ମୁଣ୍ଡ ପୁରାଇପାରିବେ ନାହିଁ । ତେଣୁ ଏହି ପ୍ରସଙ୍ଗ ଉଠିନଥିବା ଜଣାପଡ଼ିଛି । ଦୁଇ ନେତା କହିଛନ୍ତି ଭାରତ ଏବଂ ଚାଇନା କେବଳ ଭୌଗଳିକ ଦୃଷ୍ଟିକୋଣରୁ ନୁହେଁ ବରଂ ବିବିଧତା ଦୃଷ୍ଟିରୁ ମଧ୍ୟ ଦୁନିଆରେ ସବୁଠୁ ବଡ଼ ରାଷ୍ଟ୍ର । ଏହି ଅବସରରେ ମାନସରୋବର ଯାତ୍ରା ପ୍ରସଙ୍ଗରେ ଦୁଇ ନେତାଙ୍କ ମଧ୍ୟରେ ଆଲୋଚନା ହୋଇଛି । ମାନ ସୋରବରରେ ପର୍ଯ୍ୟଟକଙ୍କ ସୁବିଧା ପାଇଁ ପ୍ରଧାନମନ୍ତ୍ରୀ ମୋଦି ଜିନପିଙ୍ଗଙ୍କୁ ପ୍ରସ୍ତାବ ଦେଇଛନ୍ତି ।
ହେଲେ ଚାଇନା ରାଷ୍ଟ୍ରପତି କୌଣସି ଜବାବ ଦେଇନଥିବା ଜଣାପଡ଼ିଛି । ଏହା ବ୍ୟତୀତ ତାମିଲନାଡୁ ଏବଂ ଚାଇନା ମଧ୍ୟରେ ସମ୍ପର୍କ ବଢ଼ାଇବା ଦିଗରେ ଆଲୋଚନା ହୋଇଛି । ସେହିପରି ଚାଇନା ରାଷ୍ଟ୍ରପତି ଜିନପିଙ୍ଗ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଆସନ୍ତାବର୍ଷ ଚାଇନା ଆସିବା ପାଇଁ କହିଛନ୍ତି । ନରେନ୍ଦ୍ର ମୋଦି ମଧ୍ୟ ତାଙ୍କ ନିମନ୍ତ୍ରଣକୁ ସ୍ୱୀକାର କରିଛନ୍ତି । ଆସନ୍ତାବର୍ଷ ପ୍ରଧାନମନ୍ତ୍ରୀ ଚାଇନା ଯାଇପାରନ୍ତି ।
ସେହିପରି ଭାରତ ତରଫରୁ ଦିଆଯାଇଥିବା ଆତିଥ୍ୟରେ ଅଭିହୂତ ପ୍ରକାଶ କରିଛନ୍ତି ଚାଇନା ରାଷ୍ଟ୍ରପତି ଜିନପିଙ୍ଗ୍ । ତାଙ୍କୁ ଓ ତାଙ୍କର ପ୍ରତିନିଧିଙ୍କ ଯେଉଁଭଳି ଭାରତ ତରଫରୁ ଆତିଥ୍ୟ ଦିଆଯାଇଛି ସେଥିରେ ସେମାନେ ଖୁସି ଜାହିର କରିଛନ୍ତି । ସେହିପରି ଗତକାଲି ଚେନ୍ନାଇରେ ଓହ୍ଲାଇ ମହାବଲୀପୁରମକୁ ଆସିବା ପରେ ପ୍ରଧାନମନ୍ତ୍ରୀ ମୋଦି ଯେଉଁ ଭଳି ଭାବରେ ତାଙ୍କ ସହ କଥା ହୋଇଛନ୍ତି ତାହା ଦୁଇ ଦେଶର ସମ୍ପର୍କକୁ ଆହୁରି ଆଗକୁ ନେବ ବୋଲି ଜିନପିଙ୍ଗ କହିଛନ୍ତି ।
ଏହା ଦୁଇ ଦେଶ ମଧ୍ୟରେ କଥାବର୍ତ୍ତା ନଥିଲା ବରଂ ଦୋସ୍ତିର ଆଉ ଏକ ଯୁଗ ଆରମ୍ଭ ହୋଇଛି ବୋଲି ଜିନପିଙ୍ଗ୍ କହିଛନ୍ତି । ଆଗାମୀ ଦିନରେ ଏହି ଯାତ୍ରା ତାଙ୍କ ପାଇଁ ଓ ତାଙ୍କ ସହିତ ଆସିଥିବା ୧୦୦ ଜଣିଆ ପ୍ରତିନିଧିଙ୍କ ପାଇଁ ସ୍ମୃତି ହୋଇ ରହିବ ବୋଲି ସେ କହିଛନ୍ତି । ସେହିପରି କୋଭଲମର ତାଜ ଫିଶରମେନ ରିସୋର୍ଟରେ ଦୁଇ ଦେଶର ମୁଖିଆଙ୍କ ସହିତ ବୈଦେଶିକ ମନ୍ତ୍ରୀ ଓ ରାଷ୍ଟ୍ର ପ୍ରତିନିଧି ସାମିଲ୍ ହୋଇଥିଲେ । ଏହି ବୈଠକରେ ଦୁଇ ଦେଶ ମଧ୍ୟରେ ବିଭିନ୍ନ ପ୍ରସଙ୍ଗରେ ଆଲୋଚନା ହୋଇଥିଲା ।
ଏହି ବୈଠକ ପରେ ଦୁଇ ଦେଶର ବୈଦେଶିକ ମନ୍ତ୍ରୀ ଏକାଠି ହୋଇ ବୈଠକ କରିବେ ବୋଲି ଜଣାପଡ଼ିଛି । ଏଥିସହ ଦେଶର ସୁରକ୍ଷା ଅଧିକାରୀ ଅଜିତ ଡୋଭାଲଙ୍କ ସହ ଚାଇନାର ସୁରକ୍ଷା ଅଧିକାରୀ ଆଲୋଚନା କରିବାର କାର୍ଯ୍ୟକ୍ରମ ରହିଛି । ଗତକାଲି ମହାବଲ୍ଲୀ ପୁରମରେ ଚାଇନା ରାଷ୍ଟ୍ରପତି ଜିନପିଙ୍ଗଙ୍କୁ ଭବ୍ୟ ସ୍ୱାଗତ କରିଥିଲେ ପ୍ରଧାନମନ୍ତ୍ରୀ ।
ଏହାପରେ ବିଭିନ୍ନ ଐତିହାସିକ ସ୍ଥଳୀକୁ ଜିନପିଙ୍ଗଙ୍କୁ ବୁଲାଇ ଦେଖାଇଥିଲେ ମୋଦି । ଏହାପରେ ରାତ୍ରୀ ଭୋଜନ ବେଳେ ଦୁଇ ନେତା ଘଣ୍ଟାଏରୁ ଅଧିକ ସମୟ ଆଲୋଚନା କରିଥିଲେ । ଆସନ୍ତାବର୍ଷ ଭାରତ ଏବଂ ଚାଇନା ମଧ୍ୟରେ ଥିବା କୂଟନୀତିକ ସମ୍ପର୍କ ୭୦ ବର୍ଷରେ ପଦାର୍ପଣ କରିବ । ଏହି ଅବସରରେ ଦୁଇ ଦେଶ ସୀମା ବିବାଦର ସମାଧାନ କରିବା ଦରକାର ବୋଲି ଚାଇନାର ରାଷ୍ଟ୍ରପତି ଜିନପିଙ୍ଗ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କହିଥିବା ଜଣାପଡ଼ିଛି ।
