Anupambharat News Bureau
ବାଲେଶ୍ୱର,୧୦ା୧୦(ଅନୁପମ ମିଡିଆ): ରେମୁଣା ଥାନା ଅଧୀନ ବାଲଗୋପାଳପୁର ସ୍ଥିତ ଏକ ପେଟ୍ରୋଲ ପମ୍ପରେ ଦୁଇଜଣ ନିଶାସକ୍ତ ଯୁବକଙ୍କ ଉନ୍ମତ୍ତ କାଣ୍ଡ ଦେଖିବାକୁ ମିଳିଛି । ସମ୍ପୃକ୍ତ ଦୁଇଜଣ ଯୁବକ ହେଲେ ପ୍ରଭାକର ଦାସ (୨୪) ଓ ପ୍ରକାଶ ଦାସ (୨୬) ।
ସେମାନଙ୍କ ବିରୋଧରେ ୧୪୫/୧୯ରେ ମାମଲା ରୁଜୁ ହୋଇ ଗିରଫ କରାଯାଇଥିବା ଜଣାପଡିଛି । ସୂଚନାଯୋଗ୍ୟ, ଗତ ରବିବାର ସନ୍ଧ୍ୟାରେ ପ୍ରଭାକର ଓ ପ୍ରକାଶ ଦୁହେଁ ଏକ ବାଇକରେ ଆସି ବାଲଗୋପାଳପୁର ସ୍ଥିତ କ୍ଷୀରଚୋରା ତେଲଟାଙ୍କିରେ ତାଙ୍କ ଗାଡିରେ ୫୦ ଟଙ୍କାରେ ତେଲ ପକାଇଥିଲେ । ଏହାପରେ ତେଲ ବାବଦରେ ଟଙ୍କା ନଦେଇ ସେମାନେ ପଳାଇ ଯାଉଥିଲେ । ତେବେ ତେଲ ଦେଇଥିବା କର୍ମଚାରୀ ଜଣକ ଟଙ୍କା ମାଗିବାରୁ ସେମାନେ କିଛି ନଶୁଣି ପଳାଇ ଯାଇଥିଲେ । ପୁଣି ରାତି ପ୍ରାୟ ସାଢେ ୧୦ଟା ବେଳେ ସମ୍ପୃକ୍ତ ଦୁଇ ଯୁବକ ନିଶାସକ୍ତ ହୋଇ ତେଲ ଟାଙ୍କିକୁ ଆସି ସନ୍ଧ୍ୟାରେ ପକାଇଥିବା ତେଲ ବାବଦରେ ୫୦୦ ଟଙ୍କା ଦେଲେ । କର୍ମଚାରୀ ଜଣକ ତୁରନ୍ତ ୫୦ ଟଙ୍କା ରଖି ୪୫୦ ଟଙ୍କା ଫେରାଇଥିଲେ । ହେଲେ ପ୍ରଭାକର ଓ ପ୍ରକାଶ ସମ୍ପୃକ୍ତ କର୍ମଚାରୀ ଜଣଙ୍କୁ ଦୁର୍ବ୍ୟବହାର ପ୍ରଦର୍ଶନ କରିବା ସହ ମାଡ ମାରିଥିଲେ । ଏହାପରେ ତେଲ ମେସିନଟିକୁ ପିଟି ଭାଙ୍ଗି ଦେଇଥିଲେ । ତେଲଟାଙ୍କିର ମାଲିକ ଏ ନେଇ ଖବର ପାଇବା ପରେ ତୁରନ୍ତ ରେମୁଣା ଥାନାକୁ ଜଣାଇଥିଲେ । ପୁଲିସ ପହଞ୍ଚି ଦୁହିଁଙ୍କୁ କାବୁ କରିଥିଲା । ତେଲଟାଙ୍କିର ମାଲିକଙ୍କ ଅଭିଯୋଗ ମୂଳେ ରେମୁଣା ଥାନାରେ ୧୪୫/୧୯ ରେ ମାମଲା ରୁଜୁ ହୋଇ ଗିରଫ କରାଯାଇଥିବା ଜଣାପଡିଛି । ତେବେ ଗିରଫ ଦୁଇ ଯୁବକଙ୍କ ଘର ସ୍ଥାନୀୟ ମନ୍ଦାରପୁର ଅଞ୍ଚଳର ନିଆଁବାଗ ଗ୍ରାମରେ ବୋଲି ଜଣାପଡିଛି ।
