Anupambharat News Bureau
ତାଳଚେର,୩୦ା୧୦(ଅନୁପମ ମିଡିଆ): ଗତ କାଲିର ଘଟଣାକୁ କେନ୍ଦ୍ର କରି ଆଜି ବିଧାୟକ ଓ ଜମିହରା ପ୍ରଜାଙ୍କ ପ୍ରତି ହୋଇଥିବା ଅନ୍ୟାୟ ଓ ଅବିଚାର ଯୋଗୁଁ ଆଜି ତାଳଚେର ୧୨ ଘଂଟିଆ ବନ୍ଦ ସଫଳ ହୋଇଛି । ଏହି ବନ୍ଦ ପାଳନ ବେଳେ ତାଳଚେର କୋଇଲା ଖଣି ଅଂଚଳରେ ଥିବା ୧୦ଟି ଖଣିରୁ ଉପିାଦନ ଓ ପରିବହନ ସମ୍ପୂର୍ଣ୍ଣ ବନ୍ଦ କରିଦିଆଯାଇଥିଲା ବେଳେ ଏମ୍ସିଏଲ୍ର ବିଭିନ୍ନ କାର୍ଯ୍ୟାଳୟକୁ ଅଚଳ କରିଦିଆଯାଇଥିଲା । ତାଳଚେରର ସମସ୍ତ ଦୋକାନ ବଜାର ବନ୍ଦ ରହିବା ସହିତ, ବ୍ୟାଙ୍କ, ସମସ୍ତ ସ୍କୁଲ, କଲେଜ ଓ ସରକାରୀ କାର୍ଯ୍ୟାଳୁୟ ଗୁଡ଼ିକ ବନ୍ଦ ରହିଥିଲା । ବିଜେଡ଼ିର ଦଳୀୟ କର୍ମୀ ଓ ବିଭିନ୍ନ ଅଂଚଳର କ୍ଷତିଗ୍ରସ୍ତ ପ୍ରଜାମାନେ ତାଳଚେରର ବିଭିନ୍ନ ସ୍ଥାନରେ ପିକେଟିଂ କରିବା ସହିତ ଯାନବାହାନ ଚଳାଚଳକୁ ବନ୍ଦ କରିଦେଇଥିଲେ । ତାଳଚେର ଠାରୁ ରାଜ୍ୟର ବିଭିନ୍ନ ସ୍ଥନକୁ ଯାଉଥିବା ବସ୍ ଚଳାଚଳ ମଧ୍ୟ ବନ୍ଦ ରହିଥିଲା । ଏହି ଆନ୍ଦୋଳନ ଯୋଗୁଁ ସମଗ୍ର ତାଳଚେର ଅଂଚଳ ସମ୍ପୁର୍ଣ୍ଣ ଠପ୍ ହୋଇଯାଇଥିଲା । ଆଜି ସକାଳୁ ତାଳଚେର ଅଧିଷ୍ଠାତ୍ରୀ ଦେବୀ ମା’ ହିଙ୍ଗୁଳା ପୀଠ ଠାରୁ ବିଧାୟକ ଶ୍ରୀ ପ୍ରଧାନଙ୍କ ନେତୃତ୍ୱରେ ଏକ ବିଶାଳ ବାଇକ୍ ଶୋଭାଯାତ୍ରା ବାହାରି ଅନୁଗୋଳ ଜିଲ୍ଳାପାଳଙ୍କ କାର୍ଯ୍ୟାଳୟକୁ ଯାଇଥିଲା । ଏମ୍ସିଏଲ୍ର ଜମିହରା ପ୍ରଜାଙ୍କ ପ୍ରତି ଯେଉଁ ଅନ୍ୟାୟ ଅତ୍ୟାଚାର ଦିନକୁ ଦିନ ବୃଦ୍ଧି ପାଉଛି ତାହାକୁ ବିଧାୟକ ତୀବ୍ର ସମାଲୋଚନା କରିବା ସହିତ ପୁଲିସ ପ୍ରଶାସନ ବିନା କାରଣରେ କ୍ଷତିଗ୍ରସ୍ତ ପ୍ରଜାଙ୍କ ପ୍ରତି ବ୍ୟବହାରକୁ ସମାଲୋଚନା କରିଥିଲେ । ବିଭିନ୍ନ ଶିଳ୍ପ ସଂସ୍ଥା କୁ ଟ୍ରେନ୍ ଓ ଟ୍ରକ୍ ଯୋଗେ କୋଇଲା ଯୋଗାଣ ବାଧାପ୍ରାପ୍ତ ପାଇଥିଲା । ଆନ୍ଦୋଳନ ଯୋଗୁଁ ଯାତ୍ରୀମାନେ ହଇରାଣ ହରକତ ହେବା ସହିତ ରାସ୍ତାର ଉଭୟ ପାଶ୍ୱର୍ରେ ଶହ ଶହ ସଂଖ୍ୟାରେ ଟ୍ରକ୍ ଛିଡା ହୋଇଥିଲା । ଏଥିପାଇଁ ଉଭୟ ସରକାର କୋଟି କୋଟି ଟଙ୍କା ରାଜସ୍ୱ ହରାଇଥିବା ସୂଚନା ମିଳିଛି । ତେବେ ଅପରାହ୍ନ ୪ ଘଟିକା ଠାରୁ ଖଣି ଆନ୍ଦୋଳନ ପ୍ରତ୍ୟାହୃତ ହେବା ପରେ ଖଣି କାର୍ଯ୍ୟ ସ୍ୱଭାବିକ ହୋଇଥିବା ପୋଲିସ୍ ସୂତ୍ରରୁ ପ୍ରକାଶ ।
