Anupambharat News Bureau
ଅନୁଗୋଳ,୨୬ା୬ (ଅନୁପମ ମିଡିଆ): ବଅଁରପାଳ ଥାନା ଅଞ୍ଚଳର ଜଣେ ଶିକ୍ଷିତ ଯୁବକ ଚାକୀରି ଆଶାରେ ଠକେଇର ଶିକାର ହୋଇଛନ୍ତି । ଗ୍ରାମୀଣ ଆଶାରେ ଚାକିରି କରାଇଦେବା ନାମରେ ବ୍ୟାଙ୍କ ପରିଚାଳନା କମିଟିର ସଦସ୍ୟ ପରିଚୟ ଦେଇ ଜଣେ ବ୍ୟକ୍ତି ତାଙ୍କ ଠାରୁ ୩୧ ହଜାର ୮୦୦ ଟଙ୍କା ଠକି ନେଇଥିବା ଅଭିଯୋଗ ହୋଇଛି । ଏ ସଂପର୍କରେ ଯୁବକ ଜଣକ ବଅଁରପାଳ ଥାନାରେ ଅଭିଯୋଗ କରିବା ପରେ ପୁଲିସ ପକ୍ଷରୁ ତଦନ୍ତ ଚାଲିଛି । ଅଭିଯୋଗରୁ ପ୍ରକାଶ ଯେ, ବଅଁରପାଳ ଜଗନ୍ନାଥ ମନ୍ଦିର ନିକଟରେ ରହୁଥିବା ମାନସ ଦାସ ସ୍ନାତକ ଡ଼ିଗ୍ରୀଧାରୀ ଜଣେ ଶିକ୍ଷିତ ଯୁବକ । ନିଜକୁ ଗ୍ରାମୀଣ ବ୍ୟାଙ୍କ ପରିଚାଳନା କମଟିର ସଦ୍ୟ ପରିଚୟ ଦେଇ ଜଣେ ବ୍ୟକ୍ତି ତାଙ୍କୁ ଫୋନ କରି କହିଥିଲେ, ଗ୍ରାମୀଣ ବ୍ୟାଙ୍କରେ କିରାଣୀ ଚାକିରି ପାଇଁ ତୁମର ନାମ ଚୟନ କରାଯାଇଛି । ତେଣୁ ସବୁ ଶିକ୍ଷାଗତ ପ୍ରମାଣପତ୍ର ସହିତ ୮୦୦ ଟଙ୍କା ବ୍ୟାଙ୍କ ଆକାଉଣ୍ଟରେ ଜମା କରିବାକୁ ପଡ଼ିବ । ଚାକରୀ ଆଶାରେ ଘୂରି ବୁଲୁଥିବା ମାନସ ଏହି ଫୋନ୍ ପାଇ ଅତ୍ୟନ୍ତ ଖୁସି ହୋଇଯାଇଥିଲେ । ଅଜଣା ବ୍ୟକ୍ତିଙ୍କ ପରାମର୍ଶ ମୁତାବକ ତୁରନ୍ତ ଟଙ୍କା ଜମା କରିଥିଲେ । ଏହା ପରେ ମାନସଙ୍କ ପାଖକୁ ଡ଼ାକ ମାଧ୍ୟମରେ କିଛି ଫର୍ମ ଆସିଥିଲା । ସଂପୃକ୍ତ ବ୍ୟକ୍ତି ଜଣଙ୍କ ଫୋନ୍ କରି ପର୍ମପୂରଣ କରି ପଠାଇବା ପରେ ପୁଣି ଫୋନ୍ ଆସିଥିଲା, ଧନୁପାଲି ଗ୍ରାମୀଣ ବ୍ୟାଙ୍କ କିରାଣୀ ଭାବେ ତାଙ୍କୁ ନିଯୁକ୍ତି ପ୍ରଦାନ କରାଯାଇଛି ଓ ଏଥି ପାଇଁ ତାଙ୍କୁ କିଛି ଟଙ୍କା ଦେବାକୁ ପଡ଼ିବ । ଏପରି ଭାବେ ବିଭିନ୍ନ ବାହାନାରେ ମାନସଙ୍କ ଠାରୁ ୩୧୮୦୦ ଟଙ୍କା ଏକ ବ୍ୟାଙ୍କ ଆକାଉଣ୍ଟ ମାଧ୍ୟମରେ ଉକ୍ତ ବ୍ୟକ୍ତି ଜଣକ ନେଇଥିଲେ । ପରେ ସେ ଏକ ନିଯୁକ୍ତି ପତ୍ର ଓ ପରିଚୟପତ୍ର ଡ଼ାକ ଯୋଗେ ପଠାଇଥିଲେ । ଏହାପରେ କି;ୁ ସେ ମାନସଙ୍କ ସହ କୌଣସି ଯୋଗାଯୋଗ ରଖିନଥିଲେ । ମାନସ ଯୋଗାଯୋଗ କରିବା ପାଇଁ ବହୁବାର ଚେଷ୍ଟା କରିଥିଲେ ମଧ୍ୟ ସଫଳ ହୋଇନଥିଲେ । ଶେଷରେ ମାନସ ବଲାଙ୍ଗିରୀ ଗ୍ରାମୀଣ ବ୍ୟାଙ୍କ ଅଧ୍ୟକ୍ଷଙ୍କ ନିକଟକୁ ଫୋନ କରି ବୁଝିବା ପରେ ତାଙ୍କ ସହିତ ଠକେଇ ହୋଇଛି ବୋଲି ଜାଣିବାକୁ ପାଇଥିଲେ । ଏଥିରେ ନିରାଶ ହୋଇ ସେ ବଅଁରପାଳ ଥାନାରେ ଅଭିଯୋଗ କରିଛନ୍ତି ।
