Anupambharat News Bureau
ବ୍ରହ୍ମପୁର, ୮ା୮ (ଅନୁପମ ମିଡ଼ିଆ): ଆଜି ସକାଳ ପ୍ରାୟ ୭ଟା ୧୦ ମିନିଟ୍ ସମୟରେ ଗଞ୍ଜାମ ଓ ଗଜପତି ଜିଲ୍ଲାର କେତେକ ସ୍ଥାନରେ ମୃଦୁ ଭୂମିକମ୍ପ ଅନୁଭୂତ ହୋଇଛି । ରିକଫର ସ୍କେଲରେ ଏହାର ତୀବ୍ରତା ୩.୮ ଥିବା ସରକାରୀ ସୂତ୍ରରୁ ସୂଚନା ମିଳିଛି । ଗଞ୍ଜାମ ଜିଲ୍ଲାର ଚିକିଟି, ପାତ୍ରପୁର, ଦିଗପହଣ୍ଡି ଏବଂ ଗଜପତି ଜିଲ୍ଲାର ଆର୍. ଉଦୟଗିରି, ଅଡ଼ବା, ମୋହନା ଅଞ୍ଚଳରେ ଏହି ମୃଦୁ ଭୂମିକମ୍ପ ଅନୁଭୂତ ହୋଇଥିଲା । ଏହା ଜାଣିପାରି ଲୋକେ ବିଭିନ୍ନ ସ୍ଥାନରେ ଭୟରେ ଘର ବାହାରକୁ ଚାଲି ଆସିଥିବା କୁହାଯାଇଛି । ଗଜପତି ଜିଲ୍ଲାର କେତେକ ସ୍ଥାନରେ ଭୂମିକମ୍ପ ଅନୁଭୂତ ନେଇ ଜିଲ୍ଲାପାଳ ଅନୁପମ୍ ଶାହା ଟ୍ୱିଟ୍ କରି ସୂଚନା ଦେଇଛନ୍ତି । ତେବେ ଏଥିଦ୍ୱାରା ସେଭଳି କିଛି କ୍ଷୟକ୍ଷତି ହୋଇ ନଥିବା ଜଣାପଡ଼ିଛି । ସକାଳ ସମୟ ଏବଂ ଲୋକେ ଶୋଇ ଥିବାରୁ ଅଧିକାଂଶ ଏହାର ଝଟକା ଅନୁଭବ କରିପାରିନଥିବା କୁହାଯାଇଛି ।
