Anupambharat News Bureau
ଭୁବନେଶ୍ୱର , ୨୧ା୫ (ଅନୁପମ ମିଡିଆ): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗୁରୁବାର ଅପରାହ୍ନରେ ବାତ୍ୟା ଅମ୍ଫନ୍ ଦ୍ୱାରା ପ୍ରଭାବିତ ହୋଇଥିବା ଅଞ୍ଚଳଗୁଡିକରେ ଆକାଶ ମାର୍ଗରୁ ପରିଦର୍ଶନ କରିଛନ୍ତି ।
ବାତ୍ୟା ଯୋଗୁଁ ହୋଇଥିବା କ୍ଷୟକ୍ଷତି ବିଶେଷ କରି ଫସଲ କ୍ଷତିଗ୍ରସ୍ତ ହୋଇଥିବାରୁ ମୁଖ୍ୟମନ୍ତ୍ରୀ ଦୁଃଖ ପ୍ରକାଶ କରିଛନ୍ତି । ଏହାପରେ ମୁଖ୍ୟମନ୍ତ୍ରୀ କ୍ଷତିଗ୍ରସ୍ତ ଜିଲ୍ଲା ଗୁଡିକରେ ପ୍ରଭାବିତ ହୋଇଥିବା ଭିତ୍ତିଭୂମିର ମରାମତି ସହ ତୁରନ୍ତ ପୁନରୁଦ୍ଧାର କାର୍ଯ୍ୟ ଆରମ୍ଭ କରି ସ୍ୱାଭାବିକତା ଫେରାଇ ଆଣିବାକୁ ନିର୍ଦ୍ଦେଶ ଦେଇଛନ୍ତି । ମୁଖ୍ୟମନ୍ତ୍ରୀ ଆହୁରି କହିଛନ୍ତି ଯେ ଆସନ୍ତାକାଲି ବାତ୍ୟା ପାଇଁ ବନ୍ଦ ହୋଇଯାଇଥିବା ରାସ୍ତାକୁ ତୁରନ୍ତ ସଫା କରି ଯୋଗାଯୋଗ ସମସ୍ୟାର ସମାଧାନ କରାଯିବ । ସେସୁ ଅଧୀନରେ ଥିବା ବିଦ୍ୟୁତ୍ ଯୋଗାଣ ଆସନ୍ତା ୨୪ ଘଣ୍ଟାରେ ଏବଂ ନେସ୍କୋ ଅଧୀନରେ ଥିବା ବିଦୁ୍ୟତ୍ ଯୋଗାଣ ୭୨ ଘଣ୍ଟାା ମଧ୍ୟରେ ପୁନଃ ସ୍ଥାପିତ ହେବ । ଏହା ବ୍ୟତୀତ ଆସନ୍ତା ତିନି ଦିନ ମଧ୍ୟରେ କୃଷି ଫସଲ କ୍ଷୟକ୍ଷତିର ଆକଳନ କରି ରିପୋର୍ଟ ଦେବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତିି । ସେହିପରି ଏକ ସପ୍ତାହ ମଧ୍ୟରେ କ୍ଷତିଗ୍ରସ୍ତ ଘର ଏବଂ ଅଟ୍ଟାଳିକାର ଆକଳନ ଶେଷ କରିବାକୁ ନିର୍ଦ୍ଦେଶ ଦେଇଛନ୍ତି । ଉଲ୍ଲେଖ୍ୟଯୋଗ୍ୟ ଯେହ ବାତ୍ୟା ଅମ୍ଫାନ୍ ଯୋଗୁଁ ରାଜ୍ୟର ୮୯ ଟି ବ୍ଲକ ଏବଂ ୪୪ ଲକ୍ଷ ଲୋକ ପ୍ରଭାବିତ ହୋଇଛନ୍ତି ।
