Anupambharat News Bureau
ଭୁବନେଶ୍ୱର, ୨ା୫(ଅନୁପମମିଡ଼ିଆ): କରୋନା ଭାଇରସ ପଜିଟିଭ କ୍ଷେତ୍ରରେ ଓଡ଼ିଶାର ଏକ ନମ୍ବର ଜିଲ୍ଲା ହୋଇଛି ଯାଜପୁର । ଶନିବାର ୮ଟି ନୂଆ ପଜିଟିଭ୍ ମାମଲା ଆସିବା ପରେ ଯାଜପୁର ଜିଲ୍ଲାରେ ପଜିଟିଭ୍ଙ୍କ ସଂଖ୍ୟା ୪୮ ଛୁଇଁଛି । ଗତକାଲି ପର୍ଯ୍ୟନ୍ତ ଖୋର୍ଦ୍ଧା ୧ ନମ୍ବର ଥିଲା । ଖୋର୍ଦ୍ଧା ଜିଲ୍ଲାରେ ଏହି ସଂଖ୍ୟା ହେଉଛି ୪୭ । ରାଜଧାନୀ ଭୁବନେଶ୍ୱରରେ ଗତ ମାର୍ଚ୍ଚ ୧୫ ତାରିଖରେ ପ୍ରଥମ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଏପ୍ରିଲ ୨୯ରେ ୪୭ତମ କରୋନା ଆକ୍ରାନ୍ତ ଚିହ୍ନଟ ହୋଇଥିଲେ । କି;ୁ ଯାଜପୁର ଜିଲ୍ଲାର ରସୁଲପୁଲ ବ୍ଲକ ଅନ୍ତର୍ଗତ ବ୍ରହ୍ମବରଦାରେ ଗତ ଏପ୍ରିଲ ୩ ତାରିଖରେ ପ୍ରଥମ କରୋନା ଆକ୍ରାନ୍ତ ଚିହ୍ନଟ ହୋଇଥିଲେ ।
ଏପର୍ଯ୍ୟନ୍ତ ଯାଜପୁର ଜିଲ୍ଲାର ୧୦ ବ୍ଲକରୁ ୬ ବ୍ଲକରେ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଯାଜପୁର ଜିଲ୍ଲାର ଧର୍ମଶାଳା, ବଡ଼ଚଣା, ଦାନଗଦି ଓ ସୁକିନ୍ଦା ଆଦି ୪ଟି ବ୍ଲକରୁ ଏଯାଏଁ କୌଣସି ଆକ୍ରାନ୍ତ ଚିହ୍ନଟ ହୋଇନାହାନ୍ତି । ଜିଲ୍ଲାର ଦଶରଥପୁର ବ୍ଲକରୁ ସବୁଠାରୁ ଅଧିକ ୨୮ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଏମାନଙ୍କ ଭିତରୁ ବିରଜାପୁର ପଂଚାୟତରୁ ୪ , ଅକରପଡ଼ା ପଞ୍ଚାୟତରୁ ଜଣେ ବ୍ୟକ୍ତି ହେଉଛନ୍ତି ଅକରପଡ଼ା ଗାଁର, କଟିକଟା ପଞ୍ଚାୟତରୁ ୨୧ , ଡାହାଣୀଅଟା ପଞ୍ଚାୟତରୁ ଜଣେ , ମଲିକାପୁର ପଞ୍ଚାୟତରୁ ଜଣେ ରହିଛନ୍ତି ।ସେହିପରି ଯାଜପୁର ବ୍ଲକରୁ ୧୨ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଏମାନଙ୍କ ଭିତରୁ ବାସୁଦେବପୁର ପଞ୍ଚାୟତରୁ ୬ ଜଣ, ପଣସା ପଞ୍ଚାୟତରୁ ୨ଜଣ, ଜାଫରପୁର ପଞ୍ଚାୟତ ,କୋରେଇ ବ୍ଲକ (ମକୁନ୍ଦପୁର)ରୁ ଜଣେ ଓ ରସୁଲପୁର ବ୍ଲକ(ବ୍ରହ୍ମବରଦା)ରୁ ଜଣେ ଥିବା ଜଣାଯାଇଛି । ଶନିବାର ରାଜ୍ୟରେ ଯେଉଁ ଆଠ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି ସମସ୍ତଙ୍କ ଘର ଯାଜପୁର ଜିଲ୍ଲାରେ । ସମସ୍ତ ଆକ୍ରାନ୍ତ କୋଲକାତାରୁ ଫେରିଥିବା ସୂଚନା ମିଳିଛି । ଆକ୍ରାନ୍ତଙ୍କ ମଧ୍ୟରେ ୬ ଜଣ ପୁରୁଷ ଓ ୨ ମହିଳା ରହିଛନ୍ତି । ଯାଜପୁର ବ୍ଲକର ବାସୁଦେବପୁର ପଞ୍ଚାୟତର ୨ଜଣ, ନାଥ ସାହି ପଞ୍ଚାୟତର ଜଣେ, ବରୀ ବ୍ଲକର ୪ ଜଣ ଓ ବିଂଝାରପୁର ବ୍ଲକର ଜଣେ ଜଣେ ବୋଲି ସୂଚନା ମିଳିଛି । ରାଜ୍ୟରେ ମୋଟ ୧୫୭ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ସେଥିରୁ ୧୦୦ ଜଣ ସକ୍ରିୟ ଆକ୍ରାନ୍ତ ଅଛନ୍ତି । ମୋଟ ୫୬ ଜଣ ବ୍ୟକ୍ତି ସୁସ୍ଥ ହୋଇଥିବା ବେଳେ ଜଣେ ଲୋକ ଜୀବନ ହରାଇଛନ୍ତି । ଖୋର୍ଦ୍ଧା ଜିଲ୍ଲାରେ ଏପର୍ଯ୍ୟନ୍ତ ୩୧ ଜଣ ସୁସ୍ଥ ହୋଇଥିବା ବେଳେ ସକ୍ରିୟ ଆକ୍ରାନ୍ତଙ୍କ ସଂଖ୍ୟା ହେଉଛି ୧୫ ଜଣ । କରୋନା ଆକ୍ରାନ୍ତରେ ମୃତ ବ୍ୟକ୍ତି ଖୋର୍ଦ୍ଧା ଜିଲ୍ଲାର । ଯାଜପୁର ଜିଲ୍ଲାରେ କେବଳ ଜଣେ ବ୍ୟକ୍ତି ସୁସ୍ଥ ହୋଇଥିବା ବେଳେ ୪୭ ଜଣ ସକ୍ରିୟ ଆକ୍ରାନ୍ତ ଚିକିତ୍ସାଧୀନ ଅବସ୍ଥାରେ ଅଛନ୍ତି ।
