Anupambharat News Bureau
ବାଲେଶ୍ୱର, ୧୬ା୫ (ଅନୁପମ ମିଡିଆ): ଆଜି ପୂର୍ବାହ୍ନରେ ବାଲେଶ୍ୱର ଜିଲ୍ଲା ସଦର ମହକୁମା ଡାକ୍ତରଖାନା ସ୍ଥିତ ସମ୍ମିଳନୀ କକ୍ଷଠାରେ ଜାତୀୟ ଡେଙ୍ଗୁ ଦିବସ ପାଳିତ ହୋଇଯାଇଛି । ଏହି ଅବସରରେ ଏକ ଅନ୍ତର୍କ୍ଷେତ୍ରୀୟ ଏକାଭିମୁଖି ବୈଠକ ଅନୁଷ୍ଠିତ ହୋଇଯାଇଛି । ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡା. ଋନ କୁମାର ପାଢୀଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ ଡେଙ୍ଗୁ ଜ୍ୱର ସମ୍ବନ୍ଧିତ ବିଭିନ୍ନ ବିଷୟ ଆଲୋଚନା କରାଯାଇଥିଲା । ବିଶେଷ ଭାବେ ଏହାର ଭୟାବହତା ଏବଂ ସଂକ୍ରମଣ କିପରି ଅନ୍ୟ ରୋଗଠାରୁ ଅଧିକ ଘାତକ ସେ ସଂପର୍କରେ ଗଭୀରଭାବେ ବିଚାର ଆଲୋଚନା କରାଯାଇଥିଲା । ଏଥିପାଇଁ ବ୍ୟାପକ ଜନସଚେତନତାର ଆବଶ୍ୟକତା ଉପରେ ଗୁରୁତ୍ୱାରୋପ କରାଯାଇଥିଲା । କିପରି ଏହି କାର୍ଯ୍ୟକ୍ରମରେ ଅନ୍ୟାନ୍ୟ ବିଭାଗଗୁଡିକ ସାମିଲ ହୋଇ ପାରିବେ ଏବଂ ଏହି ରୋଗର ପ୍ରତିକାର ଓ ନିରାକରଣ ଦିଗରେ ସହଯୋଗ ପ୍ରଦାନ କରିପାରିବେ ସେ ନେଇ ବିଭିନ୍ନ ପଦକ୍ଷେପ ସ୍ଥିର କରାଯାଇଥିଲା । ବୈଠକରେ ଉପସ୍ଥାପିତ ସର୍ଭେ ବିବରଣୀରୁ ଜଣାପଡିଛି ଯେ ୨୦୧୧ ମସିହାରୁ ଆଜି ଯାଏଁ ଡେଙ୍ଗୁ ଉପରେ କରାଯାଇଥିବା ଅନୁଶୀଳନ ଅନୁଯାୟୀ ୨୦୧୭ ମସିହାରେ ସର୍ବାଧିକ ୧୨୯୬ଟି ଡେଙ୍ଗୁ କେସ୍ ଆସିଥିବା ବେଳେ ଏଥିରେ ୨ଜଣଙ୍କର ମୃତୁ୍ୟ ଘଟିଥିଲା । କିନ୍ତୁ ୨୦୧୮ ମସିହାରେ ଯଦିଓ ୨୦୩ଟି କେସ୍ ପୀକୃତ ହୋଇଛି ତେବେ କୌଣସି ଜୀବନହାନୀ ଘଟି ନାହିଁ । ୨୦୧୭ ମସିହାରେ ଜିଲ୍ଲାର ବାଲିଆପାଳ ଅଂଚଳରେ ଏହି ଜ୍ୱରରେ ସର୍ବାଧିକ ଲୋକ ଆକ୍ରାନ୍ତ ହୋଇଥିବା ବେଳେ ଏଥିରେ ୩୭ ପ୍ରତିଶତ ଲୋକ ୧୬ରୁ ୩୫ ବର୍ଷ ବୟସ ମଧ୍ୟରେ ହୋଇଥିବା ପରିସଂଖ୍ୟାନରୁ ଜଣାପଡିଛି । ଚଳିତ ବର୍ଷ ଜାନୁଆରୀରୁ ଏ ଯାଏଁ କେବଳ ୯୪ଟି କେସ୍ ପୀକୃତ କରାଯାଇଛି । ୨୦୧୭ ମସିହା ଠାରୁ ଜିଲ୍ଲାରେ ଏ ବାବଦରେ ଅନେକ ଅନୁଧ୍ୟାନ ଓ ଅନୁଶୀଳନ କରାଯାଇ ଡେଙ୍ଗୁ ଜୀବାଣୁବାହୀ ଏଡିଶ୍ ମଶାର ବଂଶ ବିସ୍ତାର ନିମନ୍ତେ ସମ୍ଭାବ୍ୟ ସ୍ଥାନଗୁଡିକ ଚିହ୍ନଟ କରାଯାଇ ସେଥିରେ ଅନେକ ସୁଫଳ ପାଇଥିବା ସ୍ୱାସ୍ଥ୍ୟ ପ୍ରଶାସନ ତରଫରୁ କୁହାଯାଇଛି । ତେବେ ଏହାକୁ ପ୍ରତିହତ କରିବା ପାଇଁ ଅନ୍ତର୍କ୍ଷେତ୍ରୀୟ ସହଯୋଗର ଆବଶ୍ୟକତା ରହିଥିବା ବିଶେଷଜ୍ଞମାନେ ମତ ଦେଇଥିଲେ । ଏଥିପାଇଁ ନଗର ଉନ୍ନୟନ ବିଭାଗ, ଜଙ୍ଗଲ ଓ ପରିବେଶ, ସୂଚନା ଓ ଲୋକସଂପର୍କ, ପଂଚାୟତିରାଜ, ସ୍କୁଲ ଓ ଗଣଶିକ୍ଷା, ତଫସିଲଭୁକ୍ତ ଜାତି ଓ ଉପଜାତି ଭଳି ପ୍ରମୁଖ ବିଭାଗଗୁଡିକର ସମନ୍ୱୟ ଏବଂ ସକ୍ରିୟ ପଦକ୍ଷେପ ଡେଙ୍ଗୁ ଜ୍ୱରକୁ ନିର୍ମୂଳ କରିବାରେ ସମର୍ଥ ହୋଇପାରିବ ବୋଲି ସେସବୁ ବିଭାଗର ସହଯୋଗ କାମନା କରାଯାଇଥିଲା । ବୈଠକରେ ଅନ୍ୟମାନଙ୍କ ମଧ୍ୟରେ ଡା. ଶଶାଙ୍କ ଶେଖର ଚୌଧୁରୀ, ଡା. ସନ୍ଧ୍ୟାରାଣୀ ପଟ୍ଟନାୟକ, ଡା. ଅନ୍ତର୍ଯ୍ୟାମୀ ମିଶ୍ର, ଡା. ପି.ସି. ନନ୍ଦୀ, ଶ୍ରୀ ପି.ପି.ପତିଙ୍କ ସମେତ ବିଭିନ୍ନ ବିଭାଗର ଅଧିକାରୀଗଣ ଯୋଗ ଦେଇଥିଲେ ।
